bIDEhUTS

bIDEhUTS 2006an sortu zen autogestiorako eta sorkuntzarako mekanismo gisa: euskal eszenaren barruan proposamen musikal autonomoak garatzeko eta elkarrekin modu asanblearioan kudeatzeko topagune bat.

Lisabörekin —proiektuaren bultzatzaileetako bat— eta, geroago, kolektiboko gainerako artistekin izandako afinitate estetiko, politiko eta afektiboak lankidetza estu eta iraunkorra ekarri zuen. Lankidetza hori, besteak beste, plataformaren 17 diskoren material grafikoa sortzean gauzatu da gaurdaino.

Lan horietan, irudiak —sorkuntza musikalaren prozesuekin estuki uztartuta— materialtasuna, testura, egitura eta karga emozionala itzultzeko lengoaia gisa funtzionatzen du, bIDEhUTSen baitan diren unibertso sonoro anitz eta konplexuen bidelaguna izanik.

Testuinguru hori, geroago bide eta sentikortasun berrietara zabaldu den ibilbide baten abiapuntua izan zen. Ibilbideak, betiere, bere muinean gordetzen ditu plataformaren funtsezko oinarriak: autogestioa, prozesuekiko zintzotasuna eta arriskuarekiko konpromisoa.